Drets des persones afectades

Er RGPD reculh drets ja existenti e les amplie, mès tanben ne cree de naui. Atau, regule:

• Eth dret d’accès

Dret dera persona afectada a saber s’eth responsable deth tractament tracte donades personaus sues e, s’ei atau, a accedir ad aguestes donades e obtier era informacion sus coma se tracten.

• Eth dret de rectificacion

Dretaa rectificar es donades personaus inexactes e que se complèten es que siguen incomplètes, quitament mejançant ua declaracion addicionau.

• Eth dret de supression (dret ath desbrembe)

Dret a obtier era supression des donades personaus, quan: ja non son de besonh entara finalitat entara quau se recuelheren; se revòque eth consentiment en que se basaue eth tractament; i a oposicion ath tractament; es donades s’an tractat illicitament; es donades s’an tractat entà complir ua obligacion legau o s’an obtengut en relacion damb era aufèrta de servicis dera societat dera informacion adreçada a menors.

Quan eth responsable a hèt publiques es donades personaus e s’an de suprimir, a d’adoptar mesures rasonables entà informar dera supression d’auti responsables que son a tractar aguestes donades. 

• Eth dret d’oposicion

Dreta a opausar-se ath tractament des donades personaus per motius restacadi damb era situacion personau dera persona afectada

Quan eth tractament a per objècte eth marqueting dirècte, includida era elaboracion de perfils restacadi damb aguest marqueting, es donades s’an de deishar de tractar de manèra immediata.

• Eth dret ara limitacion deth tractament

Dret consistent a mercar es donades de caractèr personau conservades, damb era finalitat de limitar-ne eth tractament en futur.

Era limitacion deth tractament supause que, a peticion dera persona afectada, es sues donades personaus se deisharàn de tractar.

• Eth dret ara portabilitat

Dret a recéber es donades personaus qu’a facilitat a un responsable deth tractament en un format estructurat, d’usatge comun e de lectura mecanica, e a transmeter-les a un aute responsable, se se complissen es condicions següentes: 

1.  Eth tractament se base en consentiment o en un contracte
2.  Eth tractament se hè per mejans automatizadi.

• Eth dret a non èster objècte de decisions individuaus automatizades

Dret a non èster objècte d’ua decision basada solament en tractament automatizat des donades, includida era elaboracion de perfils, que produsisque efèctes juridics sus era persona afectada o que l’afècte negativament. Açò, exceptat qu’era decision sigue de besonh entà formalizar o executar un contracte entre er interessat e un responsable de tractament, se base en consentiment explicit der interessat o sigue autorizada peth dret dera Union o der estat membre corresponent.

Toti aguesti drets s’an d’exercir deuant dera entitat responsabla deth tractament (Generalitat, deputacion, ajuntament, consòrci, universitat, etc.) que correspone.

Eth dret ara portabilitat des donades non ei exigible quan: eth tractament des donades personaus ei de besonh entà complir ua mission realizada en interès public; entà exercir poders publics conferidi ath responsable deth tractament; o quan eth tractament des donades personaus ei de besonh entà complir ua obligacion legau. Pr’amor qu’es administracions publiques hèn era majoritat des sòns tractaments de donades fondamentades en aguestes bases juridiques, se pòt díder que, en generau, eth dret ara portabilitat non ei exigible as administracions publiques en exercici des sues competéncies.

Maugrat açò, aguest dret òc que serà exigible quan eth tractament, ath delà d’efectuar-se per mejans automatizadi, aurà coma basa juridica eth consentiment der interessat o sigue de besonh entara execucion d’un contracte en quau er interessat sigue part. En conseqüéncia, en aguesti casi es administracions an d’informar deth dret ara portabilitat e facilitar-ne er exercici.

Eth responsable a d’atier era sollicitacion d’exercici deth dret en tèrme d’un mes dempús que la recep, prorogable dus mesi mès s’ei de besonh, segons era complexitat e eth nombre de sollicitacions.

S’a d’informar er interessat dera prorogacion laguens deth tèrme deth prumèr mes (dempús que se recep era sollicitacion) e indicar es motius deth retard.

Era Autoritat Catalana d'Emparament de Donades non dispause d’informacion sus quines entitats an es donades personaus que tanhen ua persona particulara.

Se voletz saber s’ua entitat dispause des vòstes donades personaus, podetz exercir, gratuïtament, eth dret d’accès deuant eth responsable deth tractament. Mejançant aguest dret, podetz obtier ua còpia des donades que se tracten e informacion sus:

• Se se tracten es vòstes donades personaus, damb quina finalitat e quini usatges concrèts.
• Es categories de donades que se tracten.
• D’a on s’an obtengut e se s’an comunicat o se pretenen comunicar, e a qui.
• Eth tèrme de conservacion des donades o es critèris entà determinar-lo.
• Eth dret a sollicitar er accès as donades, a rectificar-les o a suprimir-les, a limitar-ne eth tractament, a opausar-s’i e a sollicitar-ne era portabilitat.
• Eth dret a presentar ua reclamacion deuant ua autoritat de contraròtle, o, s’esquè, deuant deth delegat de proteccion de donades.
• Era existéncia de decisions automatizades, includida era elaboracion de perfils, e era informacion sus era logica aplicada e es sues conseqüéncies.

Er RGPD dispause que tant es accions coma es comunicacions hètes en vertut des drets reguladi en RGPD son gratuïtes, levat qu’es sollicitacions siguen manifèstament infondades o excessives, mès que mès se son repetitives. En aguest cas, eth responsable deth tractament a dues possibilitats: crubar un canon rasonable o negar-se a agir ath respècte dera sollicitacion.