Delegat de proteccion de donades

Totes es administracions publiques e es sòns organismes publics restacadi o depenenti, qu’agissen coma responsables o encargadi deth tractament de donades personaus, deuen designar obligatòriament un delegat de proteccion de donades (DPD). Pòt èster un trabalhador dera administracion publica (DPD intèrn) o ua organizacion/enterpresa extèrna ara organizacion dera administracion publica (DPD extèrn). Era designacion deth DPD s’a de comunicar ara APDCAT a trauès deth formulari de nauta corresponent.

Era obligacion des administracions publiques d’auer un delegat de proteccion de donades non afècte es enterpreses municipaus de dret privat. Açò, sens perjudici deth sòn caractèr obligatòri en cas qu’era activitat dera enterpresa compòrte ua observacion abituau e sistematica de persones a gran escala, o que compòrte eth tractament a grana escala de categories especiaus de donades o relatives a condemnes e infraccions penaus.

Tanben ei obligatòri s’era enterpresa se dedique a bèra ua des activitats previstes en article 34 dera LOPDGDD.

Entà mès informacion sus aguest ahèr, podetz consultar eth dictamen CNS 39/2019.

Òc. D’acòrd damb era LOPDGDD, es collègis professionaus e es conselhs generaus de collègis deuen designar obligatòriament un delegat de proteccion de donades.

Eth RGPD non establís ua titolacion especifica entath delegat de proteccion de donades. Maugrat açò, cau qu’age coneishences especializades en dret, sus era legislacion e practiques nacionaus e europèes en matèria de proteccion de donades e ua prigonda coneishença der RGPD. Egaument, cau qu’age practica en proteccion de donades entà poder identificar es risqui associadi as operacions deth tractament, en tot tier en compde era natura, era portada, eth contèxte e es finalitats deth tractament.

Alavetz, se deu determinar d’acòrd damb es operacions de tractament de donades que s’amien a tèrme e dera proteccion requerida entàs donades personaus tractades.

Sigue coma sigue, deu auer coneishences deth sector dera activitat de que se tracte, dera organizacion, des operacions de tractament que s’amien a tèrme e des sistèmes d’informacion.

Eth responsable deth tractament pòt contractar es servicis de delegat de proteccion de donades aufridi per un professionau, organizacion o enterpresa dehòra dera sua estructura organizativa, cada viatge que s’acrediten es competéncies professionaus a que hè referéncia er RGPD e se garentisque que non i concor cap conflicte d’interès.

Era designacion d’aguest delegat de proteccion de donades extèrn exigís formalizar un contracte d’encomana deth tractament, entà pr’amor que pogue accedir ara informacion personau qu’age de besonh entà exercir es sues foncions e dera quau sigue responsabla era Administracion contractanta.

Un viatge designat eth delegat de proteccion de donades, cau publicar es sues donades de contacte pr’amor qu’es persones interessades poguen contactar-i de manèra facila e dirècta. Tanben cau comunicar aguesta designacion ara APDCAT, a trauès deth següent formulari.

Se voletz dispausar de mès informacion sus aguest ahèr, podetz consultar eth dictamen CNS 39/2019. 

Òc. Es deputacions, en exercici des sues competéncies d’assisténcia e cooperacion tecnica enes municipis, pòden rénder eth servici de delegat de proteccion de donades a entitats locaus. Un ajuntament pòt designar un organ o ua persona ath servici dera deputacion coma delegat de proteccion de donades, cada viatge que non i age cap conflicte d’interès.

En relacion a aguesti ahèrs, podetz consultar eth dictamen CNS 23/2018.

Eth delegat de proteccion de donades pòt hèr partida deth personau deth responsable o der encargat deth tractament, o ben exercir es sues foncions en quadre d’un contracte de servicis. Pòt desvolopar d’auti prètzhèts e foncions diferentes des que estrictament corresponen ath delegat de proteccion de donades.

Totun, entà garentir era independéncia ara ora d’exercir es sues foncions, eth responsable o er encargat deth tractament an d’evitar qu’era assumpcion d’aguesti auti prètzhèts e foncions pogue dar lòc a un conflicte d’interèssi. Consegüentament, non se pòt designar coma delegat de proteccion de donades ua persona que, ath madeish temps, age prètzhèts qu’impliquen participar en procès de prenuda de decisions sus es tractaments o ena sua implementacion, en aspèctes tan cabdaus coma era implementacion des mesures de seguretat, coma ei eth cas deth responsable de seguretat dera informacion.