Atier e facilitar er exercici des drets dera autodeterminacion informativa

As d’informar era persona interessada sus es accions derivades dera sua peticion en tèrme d’un mes, que se pòt alargar dus mesi mès quan se tracte de sollicitacions especiaument complèxes. Aguest alargiment deth tèrme s’a de notificar laguens deth prumèr mes. Se decidisses non atier era sollicitacion, ac as d’informar e motivar era negativa laguens deth tèrme d’un mes dempús que se presentèc era peticion, e explicar-li que pòt presentar ua reclamacion deuant dera autoritat de proteccion de donades competentes, coma era APDCAT.

Ath delà, te cau préner totes es mesures rasonables entà verificar era identitat des persones afectades que solliciten accès e qu'exercissen era rèsta de drets previsti ena normativa. Se tractes ua grana quantitat d’informacion sus ua persona interessada pòdes demanar-li qu'especifique era informacion ara quau se referís era sua sollicitacion d’accès.

Coma entitat responsabla deth tractament, pòdes compdar damb era collaboracion des encargats deth tractament entà atier er exercici de drets des persones interessades. Aguesta collaboracion se pòt includir en contracte d’encomana de tractament.

Calerà qu'era sollicitacion entà exercir es drets sigue gratuïta, e solament poderàs crubar ua taxa s'ei manifèstament repetitiva o infondada. Era taxa a de correspóner ath còst dera procedura dera sollicitacion. En cas deth dret d’accès, se pòt considerar repetitiu eth sòn exercici en mès d’ua escadença pendent eth tèrme de sies mesi, excepcion que i age ua causa legitima entà hè'c.

Ath delà d’atier es sollicitacions, tanben te cau facilitar as persones er exercici des sòns drets. Açò supause qu'es procediments e es mecanismes entà hè'c an d’èster vedibles, accessibles e simples. Er RGPD non establís ua manèra concrèta entà exercir es drets, mès òc que cau perméter presentar es sollicitacions per mejans electronics, mès que mès quan eth tractament s’efectue per aguesti mejans.