Estructura

Direccion

Meritxell Borràs i Solé ei era directora dera APDCAT a compdar de hereuèr de 2022. Eth Plen deth Parlament ei qui designe era persona ath deuant dera Autoritat, per majoritat de tres cincaus parts, a prepausa deth Conselh Assessor de proteccion de Donades, e entà un periòde de cinc ans renauibles un solet còp.

Era sua mission ei dirigir e representar era institucion damb independéncia e objectivitat. Entre es sues foncions i a era de dictar resolucions e instruccions e aprovar recomanacions e dictamens dera Autoritat.

Saber mès

Secretariat Generau

Eth Secretariat Generau dera Autoritat hè part dera estructura dera direccion dera Autoritat. Li correspon era coordinacion des airaus de recorsi umans, contractacion e gestion economica, regim interior, transparéncia e atencion ciutadana. Concrètament, es foncions qu’a atribuïdes son era gestion des mejans personaus e materiaus restacadi, era gestion economicoadministrativa deth budget dera Autoritat, eth contraròtle der inventari de bens e drets deth patrimòni dera institucion, era elaboracion dera memòria annau, era organizacion de conferéncies, seminaris e autes activitats sus proteccion de donades personaus, e era gestion des sistèmes d’informacion dera Autoritat.

Ester Obach Medrano ei era secretària generau dera Autoritat.

Assessoria Juridica

Era Assessoria Juridica s’encargue der assessorament e era defensa juridica dera Autoritat, e era emission de repòrts sus es projèctes de normes damb reng de lei o de disposicions de caractèr generau sus proteccion de donades personaus. Li correspon, egaument, era elaboracion de dictaments en responsa as consultes que formulen es entitats der encastre d’accion dera APDCAT sus era proteccion des donades personaus. Tanben era elaboracion des repòrts preceptius dera Autoritat, enes reclamacions d’accès ara informacion que se presenten deuant dera Comission de Garentida deth Dret d’Accès ara Informacion Publica (GAIP).

Ath delà, corresponen ad aguest airau autes foncions derivades deth Reglament generau de proteccion de donades (RGPD), coma era emission de repòrts sus es consultes prealables e er estudi e era procedura des dorsièrs relatius ara aprobacion des còdis de conducta o en matèria de transferiments internacionaus.

Xavier Urios Aparisi ei eth cap dera Assessoria Juridica dera Autoritat.

Airau d’Inspeccion e Tecnica

Er Airau d’Inspeccion e Tecnica amie a tèrme es prètzhèts d’inspeccion e contraròtle, e elabòre es prepauses des resolucions sancionadores deuant d’inacompliments dera normativa de proteccion de donades. Velhe peth compliment dera legislacion en vigor sus era proteccion de donades personaus e prepause es resolucions des reclamacions formulades pes persones afectades en relacion damb es sòns drets d’accès, rectificacion, supression e oposicion, e tanben es drets ara portabilitat, era limitacion deth tractament e eth dret a non èster objècte de decisions individuaus automatizades.

Aguest airau tanben execute es plans d’auditorat e era gestion e eth contraròtle des notificacions de violacions de seguretat de donades personaus ara APDCAT, en compliment dera obligacion qu’impause er RGPD.

Fina Valls Vila ei era cap der Airau d’Inspeccion e Tecnica dera Autoritat.

Coordinacion de Tecnologies e Seguretat dera Informacion

Era persona qu’exercís era coordinacion de Tecnologia e Seguretat dera Informacion s’encargue d’assessorar estrategicament era direccion dera APDCAT en aspèctes tecnologics, e analisar er impacte des tecnologies emergentes ena privacitat. Dirigís es tecnologies dera informacion e era comunicacion dera APDCAT, e ei responsable dera seguretat corporativa. Ath delà, dirigís e coordine er assessorament e supòrt a toti es airaus dera APDCAT en matèria de tecnologies e seguretat dera informacion, segons es besonhs e especificitats de cadua. Tanben realize era avaloracion d’impacte de risqui sus es donades personaus dera APDCAT, e prepause accions, a compdar d’ua vision preventiva, de solucions multidisciplinàries. Fin finau, dirigís e coordine er assessorament e supòrt ar Airau d’inspeccion en encastre dera seguretat dera informacion e ena elaboracion des plans d’auditorats preventius.

Albert Serra Pagès ei eth coordinador de Tecnologia e Seguretat dera Informacion dera Autoritat.