Avaloracion d’Impacte de Proteccion de Donades (AIPD)

Eth Reglament establís que cau hèr-la quan serà probable qu’un tractament compòrte un naut risc entàs persones. Non descriu qué ei un naut risc, mès ditz que s’an de tier en compde aspèctes coma er usatge de naues tecnologies, parièr qu’era natura, era portada, eth contèxte e era finalitat deth tractament.

En particular, eth Reglament exigís que se hèsque ua AIPD enes 3 casi següenti:

• Avaloracion sistematica d’aspèctes personaus basadi en un tractament automatizat, sus eth quau se prenen decisions qu’afècten significativament es persones.
• Tractament a grana escala de donades de categories especiaus o donades relatives a infraccions o condemnes penaus.
• Observacion sistematica a grana escala d’ua zòna d’accès public.

Ath delà, exigís que cada autoritat de Proteccion de donades publique ua lista des tractaments que requerissen ua AIPD. En cas dera Autoritat Catalana de Proteccion de Donades, aguesta lista se pòt consultar ací. Entàs organizacions jos er encastre de competéncia dera autoritat espanhòla, era lista se pòt consultar ací.

Tanben pòt èster de besonh hèr ua avaloracion d’impacte coma resultat des garentides extra qu’exigís eth Reglament entàs tractaments damb finalitats d’archiu en interès public, estadistica o investigacion scientifica o istorica, s’atau ac determine era legislacion der estat membre (era LOPDGDD, en nòste cas).

Per contra, eth Reglament exempte de hèr ua avaloracion d’impacte enes tractaments basadi en ua obligacion legau o en interès public, quan i a ua lei der estat membre o dera Union qu’ac regule e era avaloracion d’impacte s’a amiat a tèrme en procès d’aprobacion d’aguesta lei.

En cas de dobte, se recomane hèr era avaloracion d’impacte, sustot enes tractaments mès complèxi.

En generau, era avaloracion d’impacte non s’a de comunicar ara Autoritat. Eth responsable deth tractament l’a de sauvar, per s’era Autoritat la requerís.